يگىلىكتى شارادا سويلەگەن سوزىندە وبلىس اكىمىنىڭ ءبىرىنشى ورىنباسارى ايداربەك ساپاروۆ تاۋەلسىزدىك كەزەڭىندە «مادەني مۇرا», «حالىق–تاريح تولقىنىندا» باعدارلامالارى بويىنشا تاريحي-مادەني ەسكەرتكىشتەر مەن نىسانداردى جاڭعىرتۋدا, ءتول تاريحىمىزعا قاتىستى قۇجاتتاردى جۇيەلى جيناقتاۋدا ۇلان-عايىر ىستەر تىندىرىلعانىن, ال «بولاشاققا باعدار: رۋحاني جاڭعىرۋ» ماقالاسىندا ەلباسى بۇگىنگىدەي ءدۇبىرلى دۇنيەدە سانا-سەزىمىمىز بەن دۇنيەتانىمىمىزعا ابدەن ءسىڭىپ قالعان تاپتاۋرىن قاعيدالاردان ارىلۋ, ول ءۇشىن زامانا اعىمىنا يكەمدەلۋ,جاڭا ءداۋىردىڭ جاقسى سيپاتتارىن بويىمىزعا ءسىڭىرۋ, جاڭا تۇرپاتتى جاڭعىرۋدىڭ ەڭ باستى كىلتى–ۇلتتىق كودتى ساقتاي ءبىلۋ سەكىلدى كەشەندى مىندەتتەر جۇكتەگەنىن اتاپ ءوتتى. ورتاق قۋانىشقا جينالعان جۇرتشىلىقتى اۋىل ومىرىندەگى ايتۋلى وقيعامەن قۇتتىقتادى.
«قىزىلجار» مەشىتىنىڭ باس يمامى كەنجەتاي قاجى بايكەمەل ۇلى جاراتقاننىڭ قولداۋىمەن ىسكە قوسىلعان عيباداتحانا مۇسىلمان جاماعاتىنىڭ بەس ناماز پارىزىن قازا قىلمايتىن قۇتتى ورنىنا اينالاتىنىنا سەنىم ءبىلدىردى. مەشىتتىڭ مولداسى زۇلقاينار ەرگاشەۆتىڭ قولىنا قازاقستان مۇسىلماندارى ءدىني باسقارماسىنىڭ باس ء مۇفتيى سەرىكباي قاجى ورازدىڭ قولى قويىلىپ, ءمورى باسىلعان تىركەۋ قۇجاتىن ۇستاتتى.
ارنايى ءدىني ازىرلىكتەن وتكەن يمامعا شارۋاشىلىقتار ەسەبىنەن باسپانا تۇرعىزىلىپ, جالاقى تاعايىندالاتىن بولدى.
ەلدى مەكەنگە ەرەكشە كورىك بەرەتىن بيىك مۇنارالى, اي قۇلاقتى مەشىتتىڭ سالىنۋىنا جاردەم جاساعان– ءبىلالوۆتار اۋلەتى. وعان ەسىمى بەرىلگەن سۇلتانعازى ءبىلالوۆ مارقۇم ەلىنە ەلەۋلى, حالقىنا قالاۋلى ازامات بولعان. كىشىپەيىل مىنەزىمەن, جومارت كوڭىلىمەن, قولىنىڭ اشىقتىعىمەن جۇرتشىلىق ءىلتيپاتىنا بولەنگەن. ادامعا دەگەن ەرەكشە قۇرمەت بايلىقپەن باعالانبايتىنىن, قىزمەتپەن ولشەنبەيتىنىن كوزى تىرىسىندە دالەلدەپ كەتكەن. ونىڭ اكەسى ءبىلال «حالىق جاۋى» رەتىندە اتۋ جازاسىنا كەسىلگەن. قازىر گازەت-كىتاپتاردا ءجيى باسىلىپ جۇرگەن اتالاس تۋىسى ماعجاننىڭ جالعىز سۋرەتىن سۇلتەكەڭ ساقتاپ قالعان.
جاڭا اسحانادا اس بەرىلىپ, ارۋاقتارعا قۇران باعىشتالدى.
ءومىر ەسقالي,
«ەگەمەن قازاقستان»
